Entitolat Divinòc, lo libre pareisserà en catalan en abril e qualques meses pus tard en occitan. Una campanha de finançament collectiu s’es entamenada

S’es entamenada una campanha de micromecenatge pel projècte d’un libre sus las vinhas e lo vin de Lengadòc. Entitolada Divinòc, l’òbra pareisserà en catalan e es previst que pus tard siá publicada en occitan. Sos autors son l’escrivana Griselda Lozano e Francesc Sangar, totes dos collaboradors de Jornalet.

La tòca principala de l’òbra es de far conéisser Lengadòc als legeires catalans, un país amb lo qual Catalonha parteja istòria, cultura e l’origina de sa lenga; e o vòl far a travèrs de las vinhas e de las apelacions d’origina dels vins de Lengadòc e tanben lors maridatges amb de mangiscas.

Los autors creson que s’agís d’un obratge “preciós per las librariás especializadas dins l’encastre de l’enologia e per totes los legeires interessats per l’istòria e la cultura d’Occitània.

La publicacion es prevista per mièg abril, per tal que lo libre venga un polit present per Sant Jòrdi.

La campanha de micromecenatge prevei coma recompensas d’exemplars del libre signats pels autors fins a la mençon dels mecènas dins l’òbra. E mai se tendrà una serada entre autors e mecènas al palais del Centre Excursionista de Catalonha, ont se farà un tast de vins e de formatges lengadocians. Pels mecènas pus generoses, es previst un viatge d’una dimenjada a Carcassona que compren sojorn e repaisses.

Lo libre serà cairat, de 25 x 25 centimètres, tendrà environ 250 paginas que contendràn un centenat de fotografias en colors dels païsatges naturals e de las vinhas del país.

Après l’edicion en catalan, se prevei una publicacion en occitan en 2020.


[Poblejat dins http://www.jornalet.com]