Un corrièr intèrn d’aquel còrs demanda d’identificar de nòvas susceptiblas de crear “de desafeccion envèrs las institucions del govèrn”, durant la crisi de la Covid-19

Creis la polemica per la gestion que la fa lo govèrn espanhòl de la crisi sanitària. Dimenge passat, lo cap de la Gàrdia Civila assegurava que se perseguissiá las publicacions contràrias al govèrn espanhòl. Ièr dimars, los mèdias publicavan un corrièr intèrne d’aquel còrs que demandava als agents de perseguir las informacions falsas “susceptiblas de causar d’estransi social e de desafeccion envèrs las institucions del govèrn”.
 
Après las criticas de la centralizacion e la militarizacion de la gestion, dimenge passat lo cap de l’estat major de la Gàrdia Civila diguèt dins una conferéncia de premsa que trabalhan per “reduire tot aquel clima contrari a la gestion de la crisi pel govèrn espanhòl ».
 
Aquelas declaracions causèron una enòrma polemica dins los partits de l’oposicion e un grand malèsser dins los govèrns catalan e basco.
 
Ièr, la ràdio Cadena SER pubiquèt un corrièr interne de la Gàrdia Civila que confirmava aquelas declaracions. Lo corrièr en question demanda als agents de liurar cada divendres de donadas restacadas amb de campanhas de desinformacion per tal d’elaborar “un rapòrt monografic sus las accions de ciberseguretat restacadas a la Covid-19 per fin que siá abordat dins las reünions avenidoiras amb lo departament del Ministèri [de l’Interior]”.
 
Delà las nòvas falsas, lo corrièr reclama que s’amasse de donadas sus de denóncias per delictes informatics en relacion amb la crisi del coronavirus amb una amira judiciària que permeta de blocar o barrar de sits web o de perfils de rets socials.

[Poblejat dins http://www.jornalet.com]