Ela foise achegando á proposta paseniño; ao comezo con dúbidas e logo con determinación. Trátase dunha decisión política e hai que ser consecuente con ela, explica. Elena segue, décadas despois, os pasos lingüísticos que defendía con contundencia Carvalho Calero, o homenaxeado nestas Letras Galegas.

Ricardo Carvalho Calero, homenaxeado nestas Letras Galegas do 2020, cría firmemente en que as linguas debían camiñar cara á internacionalización igual que o facía o mundo no que el vivía [“Conversas en Compostela con Carballo Calero” ( M.A. Fernán Vello/ F. Pillado Mayor. Sotelo Blanco Edicións, Barcelona, 1986, p. 182]. « O porvir do galego está en non desvinculalo das outras formas do antigo galego-portugués que se manifestan como linguas de uso extracontinental e que poden reforzar o galego depauperado en catro séculos de colonización lingüística castelá », falaba para a TVG. Súa era a loita de facer do noso un idioma competitivo.

E nesta mesma loita de reintegración do galego no portugués seguen hoxe moitas persoas espallas polo territorio. Os pasos lingüísticos de Carvalho Calero deixaron pegada ao longo da historia de Galicia e chegan ata á rapazada máis nova. 

Elena Penas, de 21 anos, baixista de Nuada, estudante de Impresión en Artes Gráficas, é un deses exemplos nos que o reintegracionismo callou aos poucos pero con forza, e sempre fóra das lindes do ámbito educativo. Á espera de poder gravar o segundo EP de Nuada xunto con Marina, Jose e Brais o antes posible e agora tamén como rapeira en solitario, Elena Penas fai da música a canle para « transmitir umha mensagem de luita pola igualdade, polo nosso país e pola nossa classe, e sempre na nossa língua ».

Este 17 de maio sería día de saír á rúa para non quedar sen idioma, mais xa que non se pode, que sexan as palabras escritas as que sirvan de reivindicación…

O ACHEGAMENTO AO REINTEGRACIONISMO

En que momento da túa vida te achegaches á proposta reintegracionista e como a fuches facendo túa?

Já levava um tempo achegada ao reintegracionismo, mas com muitas dúvidas. Nom foi até faz algo mais dum ano que comecei a utilizar a grafía reintegracionista na súa totalidade. O meu achegamento a esta foi graças ao gram trabalho que fai o movimento reintegracionista de base espalhando esta estratégia. Aprender umha norma que nom che ensinam na escola nom é tam doado, mas há muitos livros e leituras para afondar no tema. O dicionário Estraviz está mui bem para consultar e corrigir dúvidas. Também é umha gram ajuda começar a ler [« Manual de iniciaçom à língua galega » de Maurício Castro Lôpez, « História da Língua em Banda Desenhada », « Estudo crítico das normas ortográficas e morfolóxicas do idioma galego » da AGAL, « Quês e porquês do reintegracionismo », « 101 falares com jeito » da editora Através…] ou ver as séries e películas em português que antes vías em espanhol. 

Por que te decantaches por ela no canto da proposta RAG? 

Porque considero que o galego e o português som a mesma língua. Polo tanto, é necessária umha norma que, adaptando a ortografía galega, reintegre a nossa língua no âmbito lingüistico do português.

Que compromisos hai detrás desta decisión?

Há um compromiso com o nosso país.

Empregas esta normativa en todos os ámbitos da túa vida?

Nos máximos possíveis dende que tomei a decisom.

A NORMATIVA NA SOCIEDADE E NO ENSINO

Cres que é unha proposta aceptada socialmente? Por exemplo, no teu caso, tes notado incompresión por parte dalgunha persoa do teu entorno?

Sendo realistas, nom o creio. Saíndo um pouco da burbulha dás-te conta de que muita gente nom a vê como umha alternativa ou nom a conhece. Pero para isso estamos, para fazê-la possível. 

Quando decides empregar o reintegracionismo no teu dia a dia sim que atopas travas, mesmo na escola, por pôr um ejemplo. Mas é umha decisom política com a que temos que ser consequentes.

Gustaríache que dende o ensino ofrecesen a posibilidade de aprender esta normativa?

Sim, vejo necessário que se ensine português nas aulas da Galiza, mas nom como umha língua estrangeira, senom como a nossa. Vejo longe a ideia, nom vou mentir, mas acho que é a soluçom para reverter o futuro do galego. 

O FUTURO DA LINGUA

Que cres que mudaría se aceptaramos dunha maneira máis xeneralizada esta proposta? Como pensas que nos beneficiaría?

Teríamos umha norma que fai justiça á nossa língua, que a reintegra no português, afastando-a da espanholizaçom à que atualmente se vê submetida. E ademais, umha língua internacional, longe de ser minoritária e autonómica como nos querem fazer ver, capaz de comunicar-se com mais de 200 milhóns de pessoas do mundo.

Por onde cres que pasa o futuro da nosa lingua? 

O galego, com a situaçom atual, está destinado a sua desapariçom, com as políticas linguísticas jogando na contra e a falta de soberanía política do nosso povo para tomar decisons. Também podemos ver como com a rutura da transmissom intergeracional, acelerou a desgaleguizaçom das jovens. 

Mas há muitas iniciativas surgidas da base social que podem aportar muito à recuperaçom efetiva do galego: âmbitos culturais, desportivos, educativos, musicais, sindicais… fam ver que nom todo está perdido. 

Cómpre achegármonos ao portugués para sobrevivir?

Acho que sim. O reintegracionismo, a força da unidade linguística galego-luso-brasileira, é a única maneira que tem a nossa língua de fugir da espanholizaçom, e polo tanto, de reverter assím o seu futuro.

CARVALHO CALERO

Que importancia cres que ten que este Día das Letras Galegas se lle adique a Carvalho Calero, gran pensador do reintegracionismo?

É mui importante reconhecer a figura de Ricardo Carvalho Calero como reintegracionista e forte defensor da nossa língua e cultura, e também como antifascista e republicano. Se bem é certo que é um gram paso que a Real Academia Galega decidi-se adicar-lhe o 17 de maio deste 2020, tampouco temos nada que agradecer-lhe, já que leva anos negando a súa homenagem polo simples facto de ser reintegracionista.

Cales serán as túas reivindicacións neste 17 de maio?

O 17 de maio é para sair à rua berrar para que nom nos deixem sem língua. Este ano, pola situaçom atual ocasionada pola crise sanitária do COVID-19, nom podemos fazê-lo do mesmo jeito, assím que haverá que adaptar-se às reinvindicaçons telemáticas que tenha preparadas o movimento associativo. 

E diremos, máis umha vez, que a recuperaçom e normalizaçom do idioma tem que ir acompanhada dum processo de reintegraçom no espaço da lusofonía.

Também cremos necessário que nom se adie a homenagem a Carvalho Calero para o 31 de outubro, já que esta data nom garante que a sua figura seja trabalhada e divulgada como deveria. É por isto que pedimos que se lhe adique o Día das Letras Galegas 2021.

[Imaxes: Elena Penas – fonte: http://www.galiciaconfidencial.com]