La Cort Suprèma espanhòla ven de forçar que las administracions dels tres païses catalonfòns comuniquen entre ellas exclusivament en lenga castelhana

Los govèrns del País Valencian e de las Illas Balearas e la Generalitat de Catalonha an mostrat lor complicitat après la senténcia de la Cort Suprèma espanhòla qu’obliga las administracions valenciana, catalana e baleara de comunicar entre elas exclusivament en castelhan. O an fach amb un gèst sus Twitter, un gèst pichonet mas poderós: se son desirats mutualament lo bon jorn en catalan.
 
De son compte de Twitter estant, lo departament de l’educacion de la Generalitat Valenciana saludèt aqueste dimècres amb un simple “bon dia”. Sul pic, lo departament de la cultura de la Generalitat de Catalonha li repondèt “bon dia”. Enfin, tanben lo govèrn de las illas Balearas i reagiguèt amb un autre “bon dia”.

Après aquela saludacion entre los tres comptes oficials de Twitter, fòrça mond an jonch aquel “bon dia”.

De remembrar que la Cort Suprèma espanhòla ven d’obligar que las administracions del País Valencian, Catalonha e las Illas Balearas comuniquen entre ellas exclusivament en espanhòl. Aquela cort, situada a la cima de l’organizacion del poder judiciari en Espanha, confirma aital una senténcia de la Cort de Justícia del País Valencian que respondiá a una demanda de l’avocat general de l’estat espanhòl en novembre passat. Lo govèrn espanhòl, d’efièch, considèra que lo govèrn valencian deu comunicar en espanhòl amb los govèrns balear e catalan, çò que lo poder judiciari ven de confirmar. A mai, la supression de la posicion del catalan coma lenga d’usatge preferencial dins l’administracion valenciana viòla lo decret sus l’usatge de las lengas oficialas al País Valencian aprovat pel govèrn regional.

Bon dia.

— GVA Educació (@GVAeducacio) June 17, 2020

#BonDia! https://t.co/f4OZhRJ22A

— Quim Torra i Pla (@QuimTorraiPla) June 17, 2020

[Poblejat dins http://www.jornalet.com]