Es lo primièr còp dins l’istòria judiciària de l’estat espanhòl qu’un procès tendrà un traductor interprèt de lenga nòstra

Boya foguèt ja ententuda per la cort suprèma a Madrid en mai de 2018

Comença uèi lo jutjament contra Mireia Boya e lo burèu del Parlament de Catalonha de 2017. Es lo primièr procès ont se declararà en occitan amb un interprèt.

Lo procès se deviá téner del 19 al 22 de novembre passat, puèi foguèt reportat als 23 24 e 27 d’abril e fin finala la Cort de Superiora de Justícia de Catalonha a prepausat de far l’audiéncia uèi, deman e divendres. En novembre, lo jutjament se remetèt pr’amor qu’un dels acusats, Joan Josep Nuet, èra vengut deputat al Congrès dels Deputats espanhòl e que doncas aquela cort lo podiá pas pus jutjar. En abril se reportèt per la crisi sanitària de la covid-19

Per tant, ara jutjaràn l’èx-deputada occitana Mireia Boya e los èx-membres del burèu del Parlament de Catalonha Ramona Barrufet, Lluís Maria Corominas, Lluís Guinó, Anna Isabel Simó, franc de Joan Josep Nuet que lo jutjarà la Cort Suprèma a Madrid. Aquestes son acusats de desobesissença a la Cort Constitucionala per aver permés e realizat un vòte que l’aviá enebit lo tribunal.

Lo primièr procès ont se declararà en occitan amb un interprèt

Dins son escrich de defensa, que Boya presentèt en setembre pasat, l’èx-deputada exigissiá d’èsser relaxada en apelant als dreches fondamentals de participacion politica e de libertat ideologica. A mai, Boya demandèt de “declarar en occitan” car es sa “lengua mairau”. La Cort Superiora de Justícia de Catalonha acceptèt la demanda de Boya e ordenèt un servici de traduccion consecutiva d’occitan aranés. Es lo primièr còp dins l’istòria judiciària de l’estat espanhòl qu’un procès tendrà un traductor d’occitan.

Franc de Mireia Boya, los acusats fasián partida del burèu del parlament qu’acompanhavan lor presidenta, Carme Forcadell, durant la sesilha que permetèt d’aprovar lo referendum del 1r d’octòbre de 2017.

“Se volètz, vos fau perseguir tanben per rebellion”

Boya foguèt ja entenduda per la Cort Suprèma a Madrid en mai de 2018, e lo jutge remandèt son afar amb los del burèu del Parlament per que los jutgèsse la Cort Superiora de Justícia de Catalonha. Alara, pendent sa declaracion, Boya diguèt al jutge que li semblava pas just que foguèsse enseguida per “desobesissença” pel fach d’aver prepausat un debat al Parlament de Catalonha, mentre que la presidenta d’aquela cambra a la meteissa epòca, Carme Forcadell, èra perseguida e encarcerada per “rebellion” per aver permés aquel debat. Lo jutge Pablo Llarena respostèt alara a Boya: “Se volètz, vos fau perseguir tanben per rebellion”.

Quant a ela, en aquel temps nos contèt sa convèrsa amb lo jutge: “È exprimit es mèns dobtes sus era parcialitat de tot aguest procès juridic. Es interlocutòries an indicis de parcialitat. E li è dit que demori damb resignacion ua senténcia que creigui que ja ei escrita. De hèt, era interlocutòria se semble fòrça ad aguesta senténcia e li è dit qu’aguest jutjament ei teatre, ei ua pantomima politica, e qu’eth vertadèr jutjament serà a instàncies internacionaus. L’occitanisme mostrèt son sosten a la politiciana aranesa.

[Poblejat dins http://www.jornalet.com]