La programacion començarà dins l’auton que ven amb 100 oras de programacion de ràdio e 22 de television

SardoRai1

Manifestacion pel sarde a la television publica a Casteddu en agost de 2015

La RAI parlarà en lenga sarda. La television publica d’Itàlia a signat un acòrdi amb las administracions italiana e sarda après un long combat del president de Sardenha, Christian Solinas, amb las institucions de l’estat peninsular, çò rapòrta Ansa. Èra un projècte que s’esperava dempuèi de decennis: de programas en sarde suls canals de ràdio e television publics de l’illa.

La programacion començarà dins la tardor que ven amb 100 oras de programacion de ràdio e 22 de television sus la cultura, l’actualitat, l’informacion e lo divertiment. Lo projècte serà constantament susvelhat per un comitat compausada del govèrn italian, del govèrn sarde e de la RAI.

“Es un enjòc istoric, qu’avèm perseguit dempuèi lo començament de la legislatura per mejan d’un combat dobèrt e constant amb lo govèrn e l’entrepresa”, çò a dich Solinas. “Portar la lenga sarda a la RAI, dins sas divèrsas expressions, es una prestigiosa conquista e representa una nauta reconeissença de la valor e de la dignitat de nòstra identitat culturala. Volèm que la programacion radiofonica e televisiva en sarde venga una veirina liura, que pòsca exprimir de la melhora manièra la produccion jornalistica, literària, artistica, etnografica, que done d’espaci a totas sas expressions dins sa nauta valor”.

De son caire, lo president de la RAI a dich que se sent “fièr d’acuhir la lenga sarda dins sas pròprias programacions” e manifèsta “la sensibilitat de l’entrepresa envèrs totas las expressions e las identitats de la cultura del pòble italian”. Dins aquel sens a precisat que promòure la difusion d’aquelas lengas es una de las tòcas de la RAI. De veire quora arribarà lo moment per l’occitan dins las Valadas e la Gàrdia.

 

[Imatge: http://www.sardegnadies.it – poblejat dins http://www.jornalet.com]