Prezentado por Edmond Cohen 
 
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
 
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.

Vos akodro tambyen ke el proksimo atelye de konversasyon de la asosyasyon Vidas Largas se tendra el lunes primo de desyembre de las tres a las sinko, en el Centre Communautaire, 119 rue Lafayette Paris (9°) Métro Poissonnière o Gare du Nord. Tened tino ke agora es un lunes i ke la ora es tres.
 
De kualo avlarvos oy? De muevo es mi amigo Jose Molho ke me dyo una idea, i me empresto un filmo. La idea es de avlarvos de Varian Fry, un gazetero amerikano ke se topo en Marseille, en Fransya en 1940 i 1941, i ke se esforso, i lo reusho, de azer salir de Fransya unos 2.500 intelektuales i artistos, no todos djudyos ama lo mas lo eran, i ansina salvarlos de la deportasyon.
 
El filmo tyene por titolo franses – yo lo vide en franses – Héros de l’ombre (gibor de la solombra). El titolo orijinal, en ingles, es Varian’s war (la gerra de Varian). Este filmo, muy esmovyente, a sido realizado en 2001 por un syerto Lionel Chetwynd, i es el aktor William Hurt ke djuga el rolo de Fry.
 
varianfry
 
Kyen es este Fry? Nase el 15 de oktovre 1907 en New-York, en una famiya bastante rika.  Aze sus estudyos en las buenas eskolas i en Harvard, i se kaza a los 24, en 1931. En el mizmo tyempo se aze gazetero espesyalizado en los echos internasyonales. Se va en Berlin en 1935, dos anyos despues de la venida de Hitler al poder, i pishin entyende lo ke se esta pasando kontra los djudyos i los intelektuales. Aprova de konvenser los Amerikanos de arrekojer a los djudyos de Almanya para salvarlos kuando dainda se puede, ama no interesa a dingunos.
 
Kuando vyene la gerra, la armada franseza, mal komandada, se dirrite, la Fransya se topa okupada en parte por los Almanes, i el Governo franses, dirijido desde pokos diyas por el mareshal Pétain, firma el 22 de djunyo 1940 un tratado de armistisyo kon los Almanes.
 
Kale saver ke el tratado de armistisyo firmado el 22 de oktovre 1940 entre Fransya i Almanya no avla ni un byervo sovre los djudyos, ke sean fransezes o no.
 
Los ke enteyenden el franses i ke son interesados por el teksto del tratado de armistisyo lo pueden topar sovre internet
 
http://mjp.univ-perp.fr/france/1940armistice.htm
 
(Lo ke yo no saviya i ke me ambezi meldando el tratado, es ke el ke lo firmo por la Almanya en 1940 fue el mizmo ke firmo sinko anyos mas despues  el armistisyo de 1945: el feldmarschall Wilhelm Keitel, ke va ser despues kondenado a muerte en Nuremberg por krimenes kontra la umanidad, i enforkado en 1946).
 
El tratado tyene sovre todo artikolos sovre kuestyones militares. Ama yene tyene dos artikolos terrivles ke no son militares: los artikolos 3 i 19.
 
En el artikolo 3 se puede meldar lo ke sige: “El Governo franses kombidara pishin todas las otoridades i todos los servisyos administrativos fransezes del territoryo okupado de konformarse a las reglas de las otoridades militares almanas i de kolaborar kon eyas de una manera korekta.”
 
Komo lo oyitesh, la kolaboration kon los Almanes ya estava eskrita en el tratado desde junyo 1940, ama solo en el territoryo okupado. El governo franses no era ovligado de kolaborar en la parte non okupada, i por tanto el va ser ke va aferrar a los los djudyos de esta parte kon sus kriaturas, i embyarlos a los Almanes.
 
I de toda manera, komo ya lo dishe, no era kuestyon de djudyos en este tratado, salvo este terrivle artikolo 19, ande esta eskrito:” El governo franses es ovligado de entregar sovre demanda todos los suditos almanes nombrados por el Governo alman ke se topan en Fransia”.
 
Estos suditos almanes ke se topavan en Fransya eran, por lo mas de entre eyos, sea djudyos sea opozantes non djudyos al nazismo, fuyidos de Almanya, ke pensavan tener topado un refujyo en Fransya. En jeneral, fueron aferrados por los fransezes al empesijo de la gerra komo enemigos de la Fransya, i ya se topavan enserrados en kampos, salvo los ke aviyan reushido a eskondersen.
 
Varian Fry, vyendo lo ke se esta pasando, dechida de venir en Fransya en nombre de un Emergency Rescue Committee (Komitado de Salvasyon de Urjensya) i pishin ayega en Marseille kon 3.000 dolares, una chika validja i una lista de unos 200 eskrivanos i artistos en sekana. Venido djusto por una mirada de tres semanas, se va kedar 13 mezes muy yuches en los kuales va salvar a miles de djente.
 
En su primera idea, aviya vinido en Fransya para mirar la situasyon de los refujyados ajenos, sovre todo los Almanes anti-nazis menasados de ser entregados a los Nazis por aplikasyon del artikulo 19 del tratado de armistisyo. Entrega sovre demanda, ansina es el titolo de los rekodros de Varian Fry. Fry tyene kon el una lista de 200 artistos i intelektuales los mas en sekana: pintores komo Max Ernst, Marc Chagall,  eskrivanos komo Frank Werfel, ets. Presto se apersive ke no va pueder azer su lavoro ofisyalmente, i lo aze de dos maneras: una parte ofisyalmente, otra parte a eskondidas. Va dar a sus protejados falsos papeles i pasaportes echos por Bill Freier (en vedra Willi Spira) un desinador venido de Viena, ke sera despues deportado a Auschwitz, de ande aboltara bivo.
 
Kon la entrada de Amerika en la gerra, al kavo de 1941, Fry deve aboltar en Amerika. A salvado unos 2.500 personas ke pudieron, de una manera o una otra, salir de Fransya grasyas a el.
 
Entre eyos, uvo Hannah Arendt, Jean Arp, Hans Bellmer, André Breton, Alma Mahler, Heinrich Mann (el ermano de Thomas), Marc Chagall, Max Ernst, Stéphane Hessel, Claude Levi-Strauss, André Masson, Franz Werfel, ets.
 
Una vez aboltado en Amerika, Fry no puede mas azer kualkyer koza para los djudyos de Evropa. Va ser olvidado i se va azer profesor de eskola. Muere en 1967. En su vida su sola rekompensa ofisyala va ser la Lejyon de Onor franseza el ultimo anyo de su vida, en 1967. Despues de su muerte, en 1995, va ser el primer amerikano ke va resivir la medaya de los Djustos, i en 1998 va resivir la sivdadaniya de onor del Estado de Israel.
 
Al djueves le vyene, si kyere el Dyo!

 
Edmond Cohen
Paris – Fransya 

 

 
 
[Orijen: http://www.diariojudio.com]