“Fa solament un sègle, Occitània èra un país de dotze milions d’occitanofòns e ara es avalit per l’estat francés republican”, çò ditz l’escrivan que dedica son òbra a Robèrt Lafont e Mireia Boya

Amb mai d’un trentenat de disques e cinc romans publicats, Lluís Llach es vengut un dels musicians e escrivans catalans mai coneguts. Ara ven de presentar son darrièr libre Escac al destí ont l’autor vòl tendre omenatge a Occitània.

L’obratge es un roman negre que se passa dins un reialme imaginari a l’Edat Mejana ont lo “poder de la crotz” contraròtla las vidas de las gents al costat del “poder de l’espasa”. Pels personatges, Llach a causit de prenoms occitans. “Son un omenatge a Occitània. Son totes occitans. Fa solament un sègle Occitània èra un país de dotze milions d’occitanofòns, amb un prèmi Nobel, e ara es avalit per l’estat francés republican. Es tanben un omenatge a Robèrt Lafont, activista, e a Mireia Boya, que parlava aranés” al Parlament, çò a dich lo musician e escrivan dins divèrses mèdias coma Vilaweb e la Television de Catalonha.

Escac al destin es l’istòria d’un jove prèire sonat Orenç designat per enquistar sus un crime comés dins un castèl del reialme de Magens. Sa condicion de bastard del rei Ebrard d’Albir lo situa près de las esfèras de poder. Mas aquela designacion es empoisonada e Orenç risca de demorar atrapat dins las luchas escuras d’ambicions desmesuradas pel poder. De traïsons, d’aspiracions del Vatican per manténer l’estatut religiós de l’airal e la gestacion d’una guèrra civila a l’entorn d’una nòva eretgia son l’encastre d’aquela istòria.

 

LLACH, Lluís. Escac al destíUnivers, 2020. 296 paginas.

[Imatge: Univers – poblejat dins http://www.jornalet.com]