Lo realizaire Patric La Vau documenta filmograficament los darrièrs testimoniatges d’un biais de parlar, viure e comprene lo Mond que configura lo país nòstre

Ven d’espelir un nòu sit de filmes documentaris en occitan. L’a mes en òbra Patric La Vau, cercaire, collectaire e dempuèi 2005 realizaire de filmes documentaris en occitan dont plusors son estats programats sus Òc Tèle.

Los filmes de La Vau mòstran aquelas gents del país consideradas d’un autre mond e d’un autre temps, de personas vièlhas —de còps fòrça vièlhas— que son los darrièrs depositaris de sabers d’una anciana civilizacion e de la lenga del país. De fach, l’emplec de la lenga occitana —lenga mairala dels protagonistas dels filmes— crèa la fisança e la connivéncia e dona de benaise, de prigondor e de sinceritat als testimoniatges qu’articulan los filmes.

Mas sustot, La Vau filma en occitan “per refús de l’uniformizacion lingüistica” e pr’amor que la lenga nòstra es “considerada en dangièr per l’UNÈSCO”.

Patric La Vau foguèt comissari de l’exposicion “La Gironda occitana” que nos l’aviá presentada en avança dins una entrevista que li faguèrem en mai de 2012.


Vesitatz: lavaupatric.com

 

[Poblejat dins http://www.jornalet.com]