Se vòl obténer que l’UE reconesca e sostenga “las regions que presentan de caracteristicas nacionalas, etnicas, culturalas, religiosas o lingüisticas diferentas” de las oficialas

Una iniciativa ciutadana europèa se bat per “l’egalitat de las regions e la sostenibilitat de las culturas regionalas”. Sa tòca es de demanar a l’Union Europèa qu’acòrde una atencion particulara a “las regions que presentan de caracteristicas nacionalas, etnicas, culturalas, religiosas o lingüisticas que son diferentas de las de la regions de l’entorn”. Cèrcan un milion de signaturas per registrar lor iniciativa ciutadana a la Comission Europèa. Per ara, solament Eslovaquia, Ongria e Romania an atench lo nombre de signaturas necessàrias del temps que los estats que pertòcan Occitània son luènh d’aquel lindal (França: un 3,2%, Espanha: un 7,81%, Itàlia un 1,73%). Se pòt signar per sosténer l’iniciativa sus aqueste ligam.

“Ensems sèm una fòrça formidabla”

Demest d’autras revendicacions, lo projècte demanda la reconeissença dels territòris nacionals, dont los Païses Catalans o Occitània (la nacion, non pas la region). L’iniciativa recep lo sosten e l’engatjament de fòrça collectius e elegits ongreses de Transilvània e d’endacòm mai, e tanben de collectius bascos e catalans. Son pòrtavotz es l’ongrés Attila Dabis, que Vilaweb ne publica una entrevista fòrça interessanta. Per Dabis, en Euròpa i a environ cinquanta milions de personas que fan partida d’aquelas minoritats nacionalas que “ensems sèm una fòrça formidabla”.

[Imatge: Guilhèm Sevilha – poblejat dins http://www.jornalet.com]