Dins sa primièra compareissença al parlament, Francés Boya a denonciat lo non-compliment de nombroses engatjaments de Catalonha amb Aran

Lo sindic d’Aran, lo socialista Francés Boya, a comparegut davant la comission dels afars Institucionals del Parlament de Catalonha e a profechat de son intervencion per revendicar mai d’autogovèrn per Aran, mai d’argent e la competéncia totala pertocant la lenga.

Justament a prepaus de la lenga, Boya a dich qu’es lo pilar “que sosten era singuralitat d’Aran coma territòri e país” e a plangut que la Generalitat aja finançat las politicas lingüisticas del Conselh General d’Aran amb 60 000 èuros en plaça dels 100 000 de las annadas precedentas. Boya a explicat que dins los darrièrs decennis l’usatge social de l’aranés a fòrça reculat en favor del castelhan, mas tanben a assolidat qu’en Aran “era lengua non ei estada jamès ua qüestion de debat” e qu’es tostemps demorada “ath marge deth debat politic e ideologic”.

Pertocant lo finançament de las competéncias, Boya a denonciat lo non-compliment de nombroses acòrdis entre lo govèrn de la Generalitat e lo govèrn d’Aran, e a quitament afirmat que Catalonha vòl tractar Aran coma una comarca de mai.

Totun, Boya a reconegut tanben la “manca de sensibilitat” del govèrn espanhòl envèrs las revendicacions catalanas. Mas a comparat las relacions Espanha-Catalonha a las relacions Catalonha-Aran.

Sosten de de C’s, del PSC, dels Comuns e del PP a Boya

Dins los divèrses torns de paraula, los partits independentistas an volgut remarcar la bona volontat de Catalonha envèrs Aran, lo sol territòri que li es reconegut lo drech d’autodeterminacion aprovat a l’unanimitat per aquel parlament. An insistit sus la situacion excepcionala que la patís Catalonha, estofada economicament per l’estat mentre que lo parlament a pas pogut aprovar un budget, ont es ja previst lo retorn als 100 000 èuros de las politicas lingüisticas pel Conselh General d’Aran. A mai, an reprochat a Boya son supòrt al govèrn espanhòl e a la repression dels elegits independentistas catalans, e an remembrat que Catalonha reconeis plan l’identitat d’Aran, çò que l’estat espanhòl fa pas. A prepaus de la lenga, an recordat l’existéncia de las autoritats scientificas que cal respectar al marge de la politica.

Quant als partits antiindependentistas, los grops de Ciutadans, del Partit Socialista, d’En Comun Podèm e del Partit Popular son estats consents per sosténer las reclamacions de Francés Boya e sas criticas del govèrn de la Generalitat.

 

 

 

[Poblejat dins http://www.jornalet.com]