Comencèt ièr lo jutjament contra los activistas de las organizacions Ceivar e Causa Galiza, acusats de terrorisme

Actualitats - Jornalet

Comencèt ièr a Madrid un macroprocès contra dotze militants independentistas galècs pels quals lo procuraire demanda de penas d’entre 4 e 12 ans de preson. Los jutja la dicha Audiéncia Nacionala, un tribunal d’excepcion especializat en crimes de terrorisme, qu’es lo meteis que dobriguèt la procedura contra los independentistas catalans.

Los acusats son de militants de las organizacions Causa Galiza e Ceivar. La primièra es un partit politic independentista que foguèt illegalizat en 2016 pendent un an jos l’acusacion de far l’apologia del terrorisme. Quant a Ceivar, s’agís d’una organizacion antirepressiva.

Los dotze militants acusats foguèron detenguts en 2015 e 2017 dins d’operacions polemicas de la Gàrdia Civila per tota Galícia. Las nomenavan « operacion Jaro » e se faguèron jos la legislacion antiterrorista.

 

[Poblejat dins http://www.jornalet.com]