(AY 46, 1992)

Kuando i por ken fue renovada la komunidad djudia de Yafo en la epoka moderna?

Segun los istoriadores djudios ke trataron de esta kestion esto avria sido echo despues de 1850, por un grupo de djudios a la kavesera de los kualos se topava rabi Yeuda Levi de Raguza (oy Dubrovnik). Kaje al mizmo tiempo arivo a Yafo la famiya Chelouche, de los djudios de Maroko, i ay tambien ken konsidera a los miembros de esta famiya komo los primeros djudios ke se aresentaron en Yafo, verso la metad del siglo pasado. Ma, si son verdaderas las konkluziones a las kualas yego la istoriadora Dr. Hanna Ram, parese ke el onor de aver renovado la komunidad djudia de Yafo reviene a los djudios de Turkia ke empesaron a aresentarsen en Yafo en la segunda metad del siglo XVIII.

En un artikolo titulado « Las rayizes sefaradis de Yafo » i publikado por Tami Lehman Wilzig en la revista de El Al, la kompania aerea de Israel, es kontado komo Dr. Ram yego a esta konkluzion en segito a las investigasiones ke izo, despues ke fue enkargada de organziar un muzeo sovre la istoria de Tel Aviv, istoria ke segun se save empesa djustamente en Yafo.

Bazandose sovre los archivos de Sir Moses Montefiore i de la Biblioteka Nasionala i Universitaria, ansi komo sovre piedras tombalas en un viejo bedahem de Yafo, la Dra. Hanna Ram yego a unas kuantas konkluziones muy interesantes.

Por el porto de Yafo yegavan la mayoria de los djudios, entre eyos munchos de los ekspulsados de Espanya, ke vinieron a Erets Israel komo pelegrinos o para aresentarsen en la Tierra Santa. Ma de la metad del siglo XVII i asta los prinsipios del siglo XVIII, sus numero menguo muncho, entre otras a kavza de las kondisiones de vida partikularmente duras en el paiz i de los fuertes dasios ke tenian ke pagar.

La situasion empeso a trokar para bueno kuando un grupo de djudios rikos de Estambol formaron una komision para ayudar finansiariamente a la komunidad djudia de Erets Israel. Verso la metad del siglo XVIII esta komision empeso a organizar ondas de aliya a la Tierra Santa i espesialmente a Yerushalayim, ma ya se save ke a lo menos dos famiyas se aresentaron en Yafo. Mas tadre, verso la fin del siglo yegaron grupos mas grandes de djudios de Estambol i pujo ainda mas el numero de los ke eskojeron de bivir en Yafo.

Las investigasiones de la Dra. Ram permetieron de deskuvrir, entre otras, ke el lider espiritual de esta komunidad era el rabino Nisim Yaakov Forojan ke su tomba se topa en un viejo bedahem en Yafo.

La puja en el numero de los djudios de Turkia ke azian sus aliya a Erets Israel izo sovresalir el menester de un « Han » onde puedan pasar sus primeros dias (o semanas o mezes) en el paiz, asta ke topen onde morar. La solusion a este problema fue dada por Yaakov Zonana, ke enkavesava el komite de djudios de Estambol del kual avlimos, i ke merko para este buto una grande fragua en Yafo.

Bushkando a ver si kedo algo de este han, Dr. Ram tuvo la suerte de enkontrar un viejo djudio ke desde 1949 sirvio komo shamash de un kal de Yafo. El konto komo, a su yegar a esta sivdad, bushkando una fragua ke pudiera servir de kal, el oyo sovre un viejo kal onde se uzava azer orasiones anyos atras ma ke ya estava serrado.

Despues ke le fueron echas reparasiones, este kal empeso a atrayer los olim ke avian sido aresentados en Yafo, ansi ke algunos djudios veteranos ke bivian serka de ayi.

A la entrada de este kal, ke se topa en la kaye « Mazal Dagim » de la vieja Yafo, se puede ver agora una plaka sovre la kuala esta eskrito ke: « ….en este lugar fue avierto, en 1740, el primer han djudio de Yafo… ».

El kal de muestros dias okupa solo una parte de una grande fragua ke es (a la vista) el han avierto kon el ayudo de Yaakov Zonana. En desparte del kal ay en esta fragua, oy dia, moradas ansi ke una galeria de arte i un atelie de djoyeria.

El arkeologo Prof. Meir Ben Dov ke examino el lugar konfirmo la antiguedad de esta fragua, debasho de la kuala deskuvrio tambien una grande bodega. A la vista, disho el, el patron de esta fragua era muy riko. I en efekto, Zonana era riko, ma el supo tambien servirse de su rikeza para ayudar a su komunidad, entre otras, en avriendo este han ke sus restos impresionantes pueden ser vistos asta oy.

El buto de Zonana en avriendo este han era de fasilitar la aliya de djudios de Estambol a Yerushalayim, ma en desparte de esto i sin averlo planeado de antes, el pozo tambien la baza de la mueva komunidad djudia de Yafo, en la epoka moderna.

 

[Orijin: http://www.akiyerushalayim.com]