S’es aprovada una reforma de l’educacion que restablís lo drech a l’ensenhament immersiu en aquelas lengas. La drecha e l’ultradrecha an protestat a grand bruch

La sesilha del Congrès dels Deputats espanhòl foguèt ièr dijòus interrompuda pendent tres minutas a causa d’un tarabast contra lo basco, lo catalan, lo galèc e l’occitan provocat pels deputats del Partit Popular (PP) (drecha) e Vox (ultradrecha). Los deputats batián lors sètis en cridant “libertat”, per protestar contra la nòva Lei de l’educacion. Aquesta nòva lei remplaça la que l’impausèt en 2015 lo ministre del PP José Ignacio Wert e qu’establissiá l’espanhòl coma lenga veïculara de l’ensenhament dins tot l’estat. La nòva lei garentís la coneissença de la lenga màger mas permet, per exemple, que l’occitan siá tornarmai la lenga veïculara de l’educacion en Aran.

La pòrtavotz del partit socialista (PSÒE), Mari Luz Martínez Seijo, metèt fin a son discors en mercejant de lor actitud las formacions qu’an sostengut la reforma. Aqueles mots provoquèron la colèra dels deputats del PP que comencèron de far de gèstes de desaprobacion. En seguida, de deputats del PSÒE e de Podèm aplaudiguèron lo discors, del temps que los deputats del PP e de Vox entamenavan lo tarabast qu’arrestèt pendent unas tres minutas la sesilha.

Enebit de parlar catalan e galèc

Lo conflicte lingüistic foguèt present a la cambra bassa espanhòla tre dimars passat, quand se debatèt una proposicion de Vox que voliá presentar una lei per que l’educacion de tot l’estat foguèsse exclusivament en espanhòl. Los deputats catalans, bascos e galècs profechèron de lor torn de paraula per defendre lors lengas respectivas. Pasmens, la presidenta del Congrès retirèt la paraula al deputat de la CUP qu’insistissiá per far son intervencion en catalan. Qualques minutas puèi, se passèt çò meteis amb lo deputat nacionalista galèc qu’ensajava de parlar en sa lenga.

 

 

[Poblejat dins http://www.jornalet.com]