La manca d’oxigèn dins los espitals, lo retard de l’arribada dels vaccins e la marrida gestion d’un president autoritari an entraïnat una enòrma caçairolada dins tot lo país

Lo desastre sanitari que lo patís Brasil a amodat una dimenjada de protèstas contra lo president, Jair Bolsonaro. Dissabte, a 20h30, una enòrma caçairolada ressonèt per tot l’estat sud-american en seguida d’una crida que s’èra lançada suls rets socials après la situacion desastrosa qu’aclapa tot lo país e mai que mai l’estat d’Amazònas, al nòrd, ont sa capitala, Manaus, manca de lièches d’espital e d’oxigèn per tractar los malauts. Al total, Brasil compta mai de 200 000 mòrts a causa de la covid-19.

Delà las caçairoladas, i a agut de manifestacions a São Paulo, Rio de Janeiro, Belo Horizonte, Recife, Curitiba e Brasília, e d’autras vilas. Los manifestants acusavan Bolsonaro d’un “genocidi” e reclamavan lo “vaccin”.

Suls rets socials, plusors personalitats an sostengut las protèstas, dont l’èx-president Luiz Inácio Lula da Silva, que manifestèt sus Twitter son “ànsia” e son “indignacion” per “la situacion del pòble de Manaus”.

Las protèstas arribavan l’endeman que Bolsonaro aguèt anonciat tornarmai un repòrt de las vaccinacions per manca de logistica.

 

[Poblejat dins http://www.jornalet.com]