“Bolsonaro a totjorn incitat a la violéncia contra nosautres”, çò assegura l’emblematic defensor d’Amazonia e dels dreches dels pòbles originaris

Raoni Metuktire, emblematic defensor d’Amazonia e dels dreches dels pòbles originaris, a fach sa denóncia contra lo president de Brasil, Jair Bolsonaro, a la Cort Penala Internacionala (CPI) per crimes contra l’umanitat. Pel cap del pòble caiapó, Bolsonaro secuta los pòbles indigènas, destrutz lor abitat e manca lors dreches.

Raoni a presentat a la CPI un document de 65 paginas a las qualas son annexadas 21 pèças a conviccion. Redigit per l’avocat francés William Bourdon, amassa las acusacions de desenas d’ONG localas e internacionalas, e d’institucions internacionalas e scientificas especializadas en clima. Lo document denóncia la politica de Bolsonaro dempuèi son arribada al poder en genièr de 2019, una politica que cèrca de “pilhar las riquesas d’Amazonia” en impausant “de condicions de vida insuportablas pels pòbles autoctòns de cèrtas regions, per fin de los forçar de se desplaçar dels territòris cobesejats pels agricultors”. La denóncia soslinha que los indigènas an ja carament pagat lo prètz d’una desforestacion de marcha forçada amb l’assassinat d’almens sèt caps autoctòns.

A mai, la denóncia soslinha que “la destruccion de la selva amazoniana”, qu’a patit un nombre d’incendis recòrd en 2020, “constituiriá un perilh dirècte non sonque pels brasilièrs, mas tanben per tota l’umanitat”.

Lo document es ara sul burèu de la procuraira Fatou Bensouda.

Paur de represalhas

Segon Le Monde, Raoni es conscient qu’aquò provocarà la colèra dels que sostenon Bolsonaro, grands entrepreneires agricòlas e minièrs, totes pròches dels territòris caiapós. Ça que la, en despièch de la paur, assegura que pòt pas pus acceptar aquela violéncia que la desencadena Bolsonaro contra eles.

Estategia de propagacion del coronavirus

En julhet de 2020, un grop de professionals de la santat de Brasil tanben senhalèt Bolsonaro a la CPI per de “crimes contra l’umanitat” per sa gestion de la pandemia de la covid-19.

Un mes pus tard, dins una entrevista a l’AFP, Raoni acusèt lo president brasilièr de voler “tirar profièch” de la pandemia per accelerar la desaparicion dels pòbles indigènas.

Segon l’edicion brasilièra de El País, Bolsonaro auriá menat a bon tèrme “una estrategia de propagacion del coronavirus”.

[Imatge: Agência Brasil Fotografias – poblejat dins http://www.jornalet.com]