Reclaman la normalizacion de l’ensenhament del catalan e los mejans necessaris per poder prepausar un ensenhament de qualitat

Quatre sindicats d’ensenhament s’acampèron dimècres passat a Perpinhan davant l’inspeccion academica, en revendicant mai de preséncia de la lenga catalana dins las escòlas.

L’acamp seguissiá la crida dels sindicats CGT, SNES-FSU, Solidaris e FCPE que denóncian dins un comunicat que “la situacion del catalan es inedita dins lo territòri francés pr’amor que per exemple lo breton gaudís de tres oras setmanièras (nivèl de lenga, cultura bretona, nombre d’oras reglamentàrias per la o las DNL [disciplinas non lingüisticas]) del temps qu’en Catalonha Nòrd, dins la majoritat dels centres escolars, lo nombre d’oras se limita a doas per setmana.

Per quant a las DNL, l’abséncia e l’insufisença d’oras assignadas en catalan obligan de mesclar d’escolans bilingües e monolingües. Aquela situacion a per consequéncia que qualques corses se pòdon pas far en catalan.”

Per aquesta rason, los sindicats reclaman la normalizacion de l’ensenhament del catalan e lo compliment de la circulara n° 2017-072 del 12.4.2017, los mejans necessaris per poder prepausar un ensenhament de qualitat e las oras assignadas en catalan per assegurar l’ensenhament de las disciplinas non lingüisticas.

[Poblejat dins http://www.jornalet.com]