Segon un nòu estudi scientific, los vegetarians aurián una santat melhora que los manjaires abituals de carn. Las traças trapadas dins los primièrs confirmarián una melhora santat per luchar contra de cellulas damatjadas o encara de malautiás cronicas. L’estudi foguèt fach per una còla de cercaires de l’Universitat de Glasgow.

D’èsser vegetarian es mai salutari que d’èsser carnivòr

Escrich per Christian Andreu 

Aital, en l’estudi foguèron trobadas plusors traças, dichas biotraças, que son plan objectivas pr’amor que son de caracteristicas que pòdon èsser mesuradas e que se manifèstan quand i a un procès biologic. Per las mesurar cal far d’analisis de sang, d’urina o d’autres teissuts tendres.”Las biotraças pòdon senhalar d’efièches bons o marrits e son utilizadas per la lucha contra lo càncer, las malautiás cardiovascularas e mai d’una malautiá qu’arriban amb l’edat en mai d’autras condicions cronicas, çò diguèt Carlos Celis Morales, d’aquela universitat escocesa. E fins ara los avantatges salutaris d’èsser vegetarian èran pas claras”.

Los vegetarians, ça que la, avián mai de triglicerids.

Aital, per assajar de melhor comprene se i aviá de diferéncias entre la dièta d’una persona que consuma abitualament de carn e la d’un vegetarian, aquela còla de cercaires analisèt la sang e l’urina de 177 723 personas e ne faguèron un estudi prigond. Las personas foguèron classificadas entre vegetarianas (que manjan pas jamai de carn o de peissum) e manjairas de carn o carnivòras. Los cercaires analisèron las biotraças a respècte de cèrtas malautiás cardiovascularas e restacadas amb lo cancèr, lo fetge, los rens e lo diabète.

E malgrat que desseparèsson las gents pr’amor de lors edat, sèxe, educacion, etnia, obesitat, consum de tabac e d’alcòol, i trobèron de diferéncias evidentas entre los dos grops de personas. Per ansin, los vegetarians avián fòrça mens de colesteròl, de marrit colesteròl, d’apolipoproteïnas dels tipes A e B (que provòcan de malautiás cardiovascularas), de CGT e d’AST, que senhalan se la cellula patiguèt una inflamacion o foguèt damatjada, d’IGF-1 (qu’entraïna mai de cancèr cellular), de proteïnas e de creatinina. En mai d’aquò, los vegetarians tanben avián un bas nivèl de colesteròl del tipe HDL, de vitamina D e de calci.

Segon aquel estudi, los vegetarians aurián una santat melhora.

Per contra, los vegetarians tanben avián mai de triglicerids dins la sang e tanplan mai de cistatina-C (çò es que lo fetge trabalhava pas d’un biais corrècte). Segon Celis Morales, la resulta de l’estudi deu entraïnar un pensament prigond sus aquel tipe de dièta pr’amor qu’èsser vegetarian fa consumar mai de nutriments presents dins la frucha, los legums e las noses. A mai, los vegetarians tanben tenon de nauts nivèls de fibra per aquela rason. “Aquò, çò apondèt lo cercaire, ajudariá a melhor comprene perqué los vegetarians presentan un taus mai bas de biotraças quand parlam de cellulas degalhadas o de malautiás cronicas”. L’estudi foguèt publicat dins lo 28n Congrès Europèu de l’Obesitat.

 

[Poblejat dins http://www.sapiencia.eu]