“Tu te sentes plenament espanhòl per poder defendre un escudet, una nacion, una bandièra e un imne?”, çò a demandat un jornalista a l’esportiu agenés

L’esportiu agenés Aymeric Laporte, que jòga dins l’esquipa de fotbòl Manchester City, participarà ongan a sa primièra Copa d’Euròpa amb la seleccion espanhòla de fotbòl. Lo jogador occitan foguèt naturalizat espanhòl après son passatge per l’Athletic de Bilbao, ont joguèt gaireben un decenni. Pasmens, a cèrts sectors de la premsa espanhòla sembla de lor agradar pas que Laporte defenda esportivament las colors d’Espanha.

Dissabte passat, après la partida ont s’afrontèron las seleccions d’Espanha e de Portugal, un jornalista pausèt al jogador occitan una question a prepaus de son nivèl d’espanholitat. Laporte, clarament contrariat, ensagèt de respondre en tenent sas contenéncias.

— Tu te sentes plenament espanhòl per poder defendre un escudet, una nacion, una bandièra e un imne?

— Òu! Quina question, non? La vertat es qu’es una question plan fòrta. Ensajarai de respondre del melhor biais possible. Soi aicí per far la competicion al nivèl maximal e ma tòca es la meteissa que la d’Espanha, ganhar tota mena de competicions. E o donarai tot per ganhar. Degun deu pas pas dobtar qu’o donarai tot per aquela seleccion.

Vejatz lo vidèo del moment aicí:

[Poblejat dins http://www.jornalet.com]