L’a organizada la plataforma Via Galega qu’amassa mai de 40 collectius que defendon los dreches nacionals del país

Jos lo lèma “Sèm una nacion”, aperaquí dos mila personas manifestèron ièr dimenge a Compostèla per revendicar lo drech d’autodeterminacion per Galícia. “Avèm de besonh de sobeiranetat politica, economica e alimentària, car a l’ora d’ara encara subissèm las consequéncias de la crisi de 2008, qu’es totjorn que pièger, e ara la situacion s’es agreujada a causa de la guèrra d’Ucraïna”, çò explica a Nós Diario Anxo Louzao, portavotz de Via Galega. “I a fòrça rasons per sosténer aquela mobilizacion, pr’amor que la crisi a tustat encara mai las classas popularas galègas, avèm los salaris e pensions mai basses de l’estat espanhòl…”, çò precisa. La protèsta l’organizèt la plataforma Via Galega qu’amassa mai de 40 collectius que defendon los dreches nacionals de Galícia.

La protèsta se tenguèt en commemoracion del 146n anniversari de l’execucion dels nomenats Martirs de Carral. Dotze militars galècs se revoltèron en 1846 contra lo govèrn espanhòl per tal de revendicar lo retorn de las libertats e dreches de Galícia que Madrid aviá abolit. Los revoltats considèravan que Galícia èra venguda “una colònia”. Aquel eveniment “foguèt la primièra pèira del nacionalisme galèc actual”, çò apond Louzao.

[Sorsa: http://www.jornalet.com]