Prezentado por Dora NİYEGO

La korajoza amante de livros de la biblioteka, Ona Simaita, era una bibliotekaria lituana ke salvo munchas kreaturas judias durante la okupasion alemana i prezervo ovras literarias del geto de Vilna antes de ser arrestada por el Gestapo.

Nasida en Akmene, Lituania, en 1894, Ona fue edukada en Mosku i empeso a lavorar en la biblioteka de la universidad de Vilnius en 1940. Amante de livros, Ona estava emosionada de lavorar en la universidad la mas vieja del norte de Evropa.

Todo troko en 1941, kuando los nazis entraron a Lituania. Krearon un geto mizerable ande enserraron la grande populasion judia de la sivdad. Ona se sorprendo kuando sus elevos i kolegas judios desaparesieron enduna.

Sin ezitar un momento, empeso a vijitar el geto kada dia, kon el preteksto de arekojer los livros de la biblioteka. Ona se sorprendio de lo ke vido aya. Era el infierno en la tierra. Los rezidentes apenas estavan biviendo, munchos de eyos se estavan muryendo de ambre, otros los nazis los estavan matando en las kayes, i a otros los estavan embiando a los kampos de konsantrasion.

Ona paso el resto de la gerra ayudando a los judios lituanos. En sus vijitas al geto, fuyo alimentos, medisinas, i chikas armas de fuego. Despues de kada vijita, tornava kon dokumentos: letras de los rezidentes del geto a sus keridos, diarios literarios ke eskrivian la vida en el geto i varios otros dokumentos emportantes.

Ona ayudo a los judios ke reusheron a fuyirsen. Los guadro en su kaza, i kuando no kedo espasio en su kaza, miro otros lugares para eskonderlos. Obtuvo dokumentos falsos ke les permitieron guadrar sus identidad judia. Salvar a los judios de los nazis fue el sentro de su vida.

Kon fuersa i koraje, Ona eskondio las kreaturas en su sako de livros i topo famiyas ke akseptaron a guadrarlas. No se save egzaktamente kuantas personas salvo esta bibliotekaria porke no avlo kon dingunos sovre sus aktos eroikos.

En 1944, Ona fue arrestada por el Gestapo. Fue brutalmente torturada por los nazis i kondanada a la muerte. Djusto antes ke la ivan a matar, el prezidente de la Universidad de Vinio la salvo i pago una grande suma de paras por su vida.

Los nazis akseptaron a no matarla, ma no akseptaron a liberarla i la embiaron al kampo de konsantrasion de Dachau i despues a un kampo de prizion en Fransia. Ona finalmente fue liberada kuando los Aliados liberaron la Fransia en 1945.

Despues de la gerra, Ona se kedo en París, biviendo una vida trankila komo bibliotekaria. Fue onorada komo Djusta de las Nasiones por el Memorial del Olokosto en Yad Vashem en 1966, i se planto un arvole para onorarla.

Ona murio en 1970, deshando atras un trezoro de su propia eskrituria: letras, diarios, artikolos. Munchos fueron publikados en el livro kontando la vida de Ona Simaite. Desde 2015, la kaye Simaite en Vilna yeva su nombre.

 

[Orijin: http://www.salom.com.tr]