Fòrça deputats se son meses d’acòrdi per emplegar lo basco, lo catalan o lo galèc e son estats reprimits
Al Congrès dels Deputats espanhòl s’es tengut aquesta setmana un debat sus la reforma del reglament per fin que se pòsca emplegar lo catalan, l’occitan, lo basco e lo galèc dins la cambra parlamentària. Es fòrça probable que la proposicion capite mal, puèi que los partits majoritaris de portada espanhòla s’i opausan. Pasmens, lo debat a portat una revòlta lingüistica de certans deputats catalans, galècs e bascos.
Quand la deputada Montse Bassa (ERC) comencèt son intervencion en catalan, lo vicepresident de la cambra li retirèt la paraula en li demandant que parlèsse en espanhòl, coma o establís lo reglament del Congrès. Puèi, se levèt la paraula al deputat Albert Botran (CUP) per s’èsser exprimit en catalan e al deputat Néstor Rego (BNG) per aver parlat en galèc. Puèi foguèron tanplan reprimidas las intervencions de Míriam Nogueras (JXCAT) e Joan Baldoví (Compromís) per aver fach servir lo catalan e de Mertxe Aizpurua (EH Bildu) per aver emplegat lo basco. En seguida, encara parlèron quatre autres deputats en intercalant l’espanhòl dins lors parladisses en catalan e basco.
Los incidents faguèron venir mai qu’evidenta la discriminacion que patisson las lengas minorizadas de l’estat, e mai sián oficialas. En consequéncia, ERC, JxCat, CUP, PDECat, Compromís, PNB, EH Bildu e BNG an publicat una declaracion conjoncha.
“Lo Congrès expausa clarament la situacion de privilègi del castelhan. Es quitament pas establit dins lo reglament, mas la presidéncia [de la cambra] se fonda suls usatges e costumas per rebutar l’expression en quina autra lenga que siá, a la diferéncia d’autres parlaments que rebaton lo plurilingüisme, coma lo de Soïssa o los de Belgica o Canadà, païses, per aquestes darrièrs, qu’istoricament tanben an impausat una lenga sus una autra”, çò ditz lo tèxt.
[Sorsa: http://www.jornalet.com]
sephatrad 